*....Mera Maazi....*

Apnay maazi ke tasawwur se haraasaan hoon main
Apnay guzray howe ay’yaam se nafrat hai mujhay,

Apni bekaar taman’naoun pe sharminda hoon main
Apni be-sood ummeedoun pe nadaamat hai mujhay,

Mere maazi ko andheroun mein daba rehnay do
Mera maazi meri zillat ke siwaa kuch bhi nahin,

Meri ummeedoun ka haasil meri khuwaahish ka sila
Aik be-naam aziy’yat ke siwaa kuch bhi nahin,

Kitni be-rabt taman’naoun ke mub’bham khaakay
Apnay khuwaaboun mein basaa’e thay kisi ki khaatir
Mujh se ab meri muhabbat ke fasanay na kaho
Mujh ko kehnay do keh main ne inhain chaha hi nahin,

Aur woh mast nigaahain jo mujhay bhool gaein
Main ne un mast nigaahoun ko saraha hi nahin,

Mujh ko kehnay do keh main aaj bhi jee sakta hoon
Ishq naakaam sahi, zindagi naakaam nahin,

Unko apnaaney ki khuwaahish inhain paanay ki talab
Shouq-e-bekaar sahi, Saa’im ghum-e-anjaam nahin,

Wohi gaysoo, wohi nazrain, wohi aariz, wohi jism
Main jo chaahoun to mujhay aur bhi mil saktay hain
Woh kanwal jin ko kabhi un ke liye khilna tha
Unki nazroun se bahut door bhi khil saktay hain…